ТҮРКІСТАН: ЖЕКЕ ЖӘНЕ ЗАҢДЫ ТҰЛҒАЛАРДЫҢ ЖОЛДАНЫМДАРЫН ҚАРАУ САПАСЫН ЖАҚСАРТУ ЖОЛДАРЫ ҚАРАЛДЫ.

Қазақстан Республикасының Бас Прокуроры Берік Асыловтың төрағалығымен жеке және заңды тұлғалардың жолданымдарын қарау сапасы бойынша кеңес өтті. Жиынға онлайн режимде Түркістан облысының әкімі Дархан Сатыбалды мен облыс әкімінің бірінші орынбасары Зұлпыхар Жолдасов, облыс прокуроры Мұрат Тлеубердиев, Бас прокуратураның Құқықтық статистика және арнайы есепке алу жөніндегі комитетінің Түркістан облысы бойынша департаментінің бастығы Асқар Сапарғалиев, облыс әкімі аппаратының басшылығы, аудан, қала әкімдері мен аппарат басшылары, облыстық басқарма басшылары мен құзырлы орган басшылары қатысты.

Комитеттің аумақтық департаменттері мен прокуратура органдары бірлесіп, 2023 жыл және 2024 жылдың 8 айында жергілікті атқарушы органдарда жеке және заңды тұлғалардың жолданымдарын қарау саласындағы заңнаманың сақталуына тексеру жүргізген болатын.

Комитет төрағасы Сабит Нұрлыбай тексеру нәтижесінде анықталған бұзушылықтар мен статистикалық есепті бұрмалау деректері туралы баяндама жасады.

Облыстағы өтініштердің қаралуы, кемшіліктер мен заңбұзушылықтардың алдын алу жұмыстарының жағдайы бойынша тиісті жұмыстар жүргізілуде. Бас Прокурор Берік Асылов жүргізілген жұмыстарға қарамастан, кемшіліктер мен заң бұзушылықтардың саны артып жатқанын жеткізді. Көрсетілген кемшіліктер мен заң бұзушылықтарға бақылауды күшейтіп, жол бермеу бойынша нақты шараларды қабылдау қажет екенін айтты. Жауапты тұлғаларға алдағы уақытта заң бұзушылықтарды болдырмау және заңнама талаптарының сақталуын, сондай-ақ өтініштердің сапалы әрі мерзімінде қаралуын тапсырды.