Іс-шараның басты мақсаты – балалардың шығармашылық қабілеттерін арттыру, олардың қиялы мен дүниетанымын кеңейту, сонымен қатар отбасылық құндылықтарды, достық пен бірлікті насихаттау. Сайысқа әртүрлі жастағы балалар қатысты. Әрқайсысы түрлі түсті борларды қолдарына алып, асфальт бетіне өз армандарын, қиялындағы әлемді бейнелеуге тырысты.
Сайыс барысында балалар тек сурет салып қана қоймай, өз туындылары жайлы қысқаша әңгімелеп те берді. Бірі отбасы мүшелерін бейнелесе, енді бірі көк аспанда қалықтаған ұшақтарды немесе гүлге толы жайқалған алқаптарды салды. Балалар үшін бұл тек сайыс қана емес, өз ойын еркін жеткізе алатын шығармашылық алаң болды.
Іс-шараны ұйымдастырушылар балалардың белсенділігі мен тапқырлығына жоғары баға беріп, барлық қатысушыларға алғыс хаттар мен естелік сыйлықтар табыс етті. Жеңімпаздар түрлі аталымдар бойынша марапатталды: «Ең әдемі сурет», «Ең креативті туынды», «Балалық шақ бейнесі» және т.б.
Ата-аналар мен көрермендер де балаларға қолдау білдіріп, олардың өнеріне тәнті болды. Сайыс алаңы балалардың күлкісіне, жарқын түстерге, шат-шадыман көңіл-күйге толы болды. Іс-шара соңында ұйымдастырушылар мұндай шығармашылық кездесулерді дәстүрлі түрде өткізіп тұруды жоспарлап отырғандарын айтты.
«Бақытты балалық шақ» атты асфальтқа сурет салу сайысы – балалардың шынайы қуанышын, қиялының шексіздігін және олардың жарқын болашаққа деген үмітін айқын көрсеткен тамаша шара болды.
