Сауран ауданы білім бөліміне қарасты. «Дара бала » бастауыш мектеп балабақшасында 4-сынып оқушылары үшін есте қаларлықтай сәттердің бірі – бастауышпен қоштасу кеші ұйымдастырылды.

Сауран ауданының білім бөліміне қарасты «Дара бала » бастауыш мектеп балабақшасында 4-сынып оқушылары үшін есте қаларлықтай сәттердің бірі – бастауышпен қоштасу кеші ұйымдастырылды. «Қош бол, бастауыш!» атты бұл мерекелік кеш оқушылардың төрт жыл бойы алған білімдері мен тәрбиелерін қорытындылайтын маңызды шаралардың бірі болды.

Мерекелік шарада оқушылар ән шырқап, би билеп, жүрекжарды тілектерін жеткізді. Сонымен қатар, балалар ұстаздары мен ата-аналарына арнау өлеңдерін оқып, өз ризашылықтарын білдірді. Бұл кеш – бүлдіршіндердің үлкен өмір жолына жасаған алғашқы қадамдарының бірі ретінде есте қалмақ.

Оқушылардың бойына білім нәрін сепкен сынып жетекшісі Ажибай Нейла Бекмуратқызына ата-аналар мен мектеп әкімшілігі алғыс білдіріп, алдағы уақытта да шығармашылық табыс пен сәттілік тіледі.

Әр адамның өмірінде ерекше орын алатын, жүрек түкпірінде мәңгі сақталатын жан – алғашқы ұстаз. Ол бізге әліппені танытып, өмірдің алғашқы сабақтарын үйреткен, мейірімділік пен ізгіліктің нұрын сепкен ардақты жан. Алғашқы ұстаз – тек білім беруші ғана емес, сонымен қатар бала жүрегіне жол таба білген тәрбиеші, ақылшы, екінші анамыздай ыстық жан.

Алғаш мектеп табалдырығын аттаған күннен бастап, бізге әр әріпті таныстырып, санды үйретіп, дүниетанымымызды кеңейтті. Ұстазымыздың жылы жүзі, сабырлы үні, әр балаға деген ерекше ықыласы бізді білімге, ізденіске жетеледі. Кейде қате жасап, тапсырманы орындамай қалсақ та, ұстазымыз ешқашан ұрыспай, сабырмен түсіндіріп, әрдайым қолдау көрсететін. Осындай қамқорлық пен мейірімділік – шынайы ұстазға тән қасиет.

Алғашқы ұстаз – баланың болашағына жол сілтейтін шырақшы іспеттес. Ол берген білім мен тәрбие өмір бойы адаммен бірге жүреді. Ұстаздан алған тәлімнің арқасында біз өзімізге сенімді, тәртіпті, жауапкершілігі мол тұлға болып қалыптасамыз.

Қайда жүрсек те, қандай биікке жетсек те, алғашқы ұстазға деген алғысымыз шексіз. Себебі олар біздің бойымызға ең алғаш адамгершілікті, еңбекқорлықты, адалдықты сіңірген. Сондықтан да алғашқы ұстаз есімі – жүректегі мәңгілік естелік.

Бұл кеш балалардың жүрегінде ұмытылмас естелік болып сақталары анық. Түлектерімізге келешекте тек қана сәттілік тілейміз. Орта буында да білім жолында жарқырай беріңдер!