«Менің болашақ мамандығым» тақырыбында 9- сыныптарға түсіндірме жұмыстары жүргізілді.

Кәсіптік бағдар – жарқын болашаққа бастар жол!Мамандық таңдау – әр адамның өміріндегі ең маңызды шешімдердің бірі. Себебі дұрыс таңдалған мамандық адам өмірінің бағытын анықтап, болашағына тікелей әсер етеді. Әр адам өз қабілеті мен қызығушылығына сай мамандық таңдаса, ол өз ісін сүйіп істейді және қоғамға да пайдасын тигізеді. Ал егер мамандық кездейсоқ немесе ата-ананың, достардың ықпалымен таңдалса, ол адам болашақта өз еңбегінен қанағат таба алмауы мүмкін.

Қазіргі заманда мамандықтар өте көп. Уақыт өткен сайын жаңа салалар, жаңа кәсіп түрлері пайда болуда. Сондықтан жастарға бағыт-бағдар берудің маңызы зор. Мектеп қабырғасынан бастап әр оқушы өзінің бейімін, қабілетін анықтап, соған қарай бағыт алғаны жөн. Мысалы, техникаға қызыққан бала инженер, бағдарламашы, механик болуға бейім болса, ал шығармашылыққа жақын жастар журналистика, суретшілік, музыка немесе дизайнерлік бағыттарды таңдауы мүмкін.

Мамандық таңдауда ең бастысы – өз жүрегіңді тыңдау. Адам тек сүйікті ісімен айналысқанда ғана табысқа жетеді. Сонымен қатар еңбек нарығын да ескерген жөн. Қай салада мамандар көп, қай салада сұраныс жоғары екенін зерттеу де маңызды. Өйткені заманауи өмір бәсекеге толы, сондықтан таңдаған мамандық тек қызықты ғана емес, сонымен бірге тұрақты табыс әкелетіндей болуы керек.

Мамандық таңдау – тек кәсіби бағыт емес, бұл – өмірлік жолды айқындау. Әр адам өз ісінің шебері болуға ұмтылуы керек. Егер адам өз орнын дұрыс тапса, ол қоғамға да, өзіне де пайда әкеледі. Сондықтан жастарға айтар кеңес – өзіңді таны, қабілетіңді дамыт, арманға қарай батыл қадам жаса. Сонда ғана сен таңдаған мамандық сені биік жетістіктерге жетелейді.