«ҚАМҚОРЛЫҚ»ОРТАЛЫҒЫ ТҮРКІСТАНДА АШЫЛДЫ.

2025 жылдың 22 желтоқсан күні Түркістан облысының орталығы — киелі Түркістанда менталды бұзылыстары бар балаларды ерекше қолдауға бағытталған аса маңызды әлеуметтік нысанның бірі — «Қамқорлық» арнаулы қызметтер көрсету орталығы өз жұмысын бастады. Осы Орталықтың ашылу рәсіміне Түркістан облысының әкімі Нұралхан Көшеров қатысып, тұрғындарға арнап құттықтау сөзін сөйлеген соң «Самұрық- Қазына» АҚ-ның басқарушы директоры Ғибрат Ауғанов

«Қазақстан халқына» қоғамдық қорының басқарма төрағасының орынбасары София Айсағалиева, «Қамқорлық» корпоративтік қорының директоры Арайлым Еркінқызы өздерінің жақсы тілектерін білдіре отырып,алдағы кезде халыққа әлеуметтік қызмет көрсететін жаңа нысандарды іске қосу мен осы бағыттағы игі бастамаларды одан әрі жүйелі түрде іске асыра беретіндіктерін жеткізді.

Түркістан облысы жұмыспен қамтуды үйлестіру және әлеуметтік бағдарламалар басқармасына қарасты осы «Қамқорлық»орталығы жартылай стационарлық үлгісінде жұмыс істейтін болады және бір мезетте 3 жастан 18 жасқа дейінгі мүмкіндігі шектеулі 125 баланы қабылдай алады. Мұнда балаларға тұрмыстық, әлеуметтік-медициналық, әлеуметтік-психологиялық, әлеуметтык-педагогикалық, әлеуметтік-мәдени, әлеуметтік-құқықтық және әлеуметтік-экономикалық қызметтер көрсетеді.

Менталды бұзылыстар — адамның ойлау қабілетіне, эмоциясына, мінез-құлқына және күнделікті өміріне әсер ететін психикалық жағдайлар. Олар уақытша да, ұзақ мерзімді де болуы мүмкін және адамның әлеуметтік қарым-қатынасына, жұмысқа қабілетіне, өмір сапасына тікелей ықпал етеді. Қазіргі қоғамда менталды бұзылыстар кең таралғанымен, бұл тақырып әлі де толық ашық айтылмайды.
Менталды бұзылыстардың түрлері өте көп. Ең жиі кездесетіндеріне депрессия, мазасыздық (тревожность) бұзылыстары, биполярлық аффективті бұзылыс, шизофрения, обсессивті-компульсивті бұзылыс және посттравмалық стресс бұзылысы жатады. Бұл аурулар адамның көңіл күйін ғана емес, ойлау жүйесін, шешім қабылдау қабілетін де өзгертуі мүмкін.
Менталды бұзылыстардың пайда болу себептері әртүрлі. Оларға тұқым қуалаушылық, ми қызметінің ерекшеліктері, ұзақ уақытқа созылған стресс, психологиялық жарақат, әлеуметтік қиындықтар, жалғыздық және созылмалы шаршау әсер етеді. Кей жағдайда бірнеше фактор бір мезгілде ықпал етіп, аурудың асқынуына әкеледі.
Өкінішке қарай, қоғамда менталды бұзылыстарға қатысты стереотиптер мен қорқыныштар көп. Көп адам психологиялық көмекке жүгінуді әлсіздік деп қабылдайды. Бұл — қате түсінік. Менталды денсаулық — физикалық денсаулық сияқты маңызды. Дәрігерге дер кезінде қаралу аурудың асқынуын болдырмауға және толыққанды өмір сүруге мүмкіндік береді.
Менталды бұзылыстарды емдеу кешенді түрде жүргізіледі. Оған психотерапия, дәрі-дәрмекпен емдеу, әлеуметтік қолдау және өмір салтын өзгерту кіреді. Жақын адамдардың түсіністігі мен қолдауы да үлкен рөл атқарады.
Қорытындылай келе, менталды бұзылыстар — ұялатын немесе жасыратын мәселе емес. Бұл — емделетін және бақылауға болатын жағдай. Қоғамда психикалық денсаулық туралы ашық айту, ақпараттандыру және өзара қолдау мәдениетін қалыптастыру — әрбір адамның бақытты әрі сапалы өмір сүруінің маңызды шарты.