ӘЗІМБЕК ПАЗЫЛБЕКҰЛЫ: ҚҰРЫЛЫС САПАСЫ МЕН ХАЛЫҚ ИГІЛІГІ – БАСТЫ НАЗАРДА.

Түркістан қаласының әкімі Әзімбек Пазылбекұлы қала аумағында жүзеге асырылып жатқан тұрғын үй құрылыстарының барысын бақылап, бірқатар әлеуметтік нысандардағы жұмыстардың жай-күйімен танысты.

Алдымен қала басшысы әкімдік тапсырысы аясында салынып жатқан жалпы«Жібек жолы» тұрғын үй кешеніндегі құрылыс жұмыстарын аралады. Аталған кешенде 10 көп қабатты тұрғын үй бой көтеруде. Оның ішінде 6 тұрғын үйден сатып алынатын арендалық бағыттағы 512 пәтер пайдалануға берілмек. Ал қалған 4 тұрғын үйдегі 432 пәтер «Отбасы банк» арқылы жеңілдетілген ипотекалық кредиттік бағдарлама аясында тұрғындарға ұсынылады.

Құрылыс нысандарын аралау барысында қала әкімі тұрғын үйлердің сапасына ерекше мән беріп, мердігер мекеме басшыларымен кездесті. Кездесу барысында анықталған кемшіліктерді жою, құрылыс жұмыстарын белгіленген талаптарға сай әрі уақытылы аяқтау қажеттігін қатаң ескертті.

Сонымен қатар Әзімбек Пазылбекұлы ипподромға апаратын жол бойындағы абаттандыру және көгалдандыру жұмыстарымен танысты. Аталған аумақта 1500 дана ағаш отырғызылып, су ұңғымасы қазылып, автоматты суару жүйесінің құрылысы жүруде және биіктігі 2 метр болатын қоршаулар орнатылуда.

Аралау барысында қала басшысы денсаулық сақтау нысандарын да аралап, 1 мөлтек ауданында орналасқан №3 қалалық аурухана мен Н. Сандыбаев көшесіндегі №6 отбасылық ауруханасында болды. Алдағы жылға жоспарланған ағымдағы жөндеу жұмыстары бойынша сала мамандарымен кездесіп, халық денсаулығы әрдайым басты назарда болуы тиіс екенін, келушілерге барынша қолайлы жағдай жасалуы қажет екенін атап өтті.

Сонымен қатар, Әзімбек Пазылбекұлы биыл қолға алынған 32 көп қабатты ескі тұрғын үйлердің қасбеттерін жаңғырту және әрлеу жұмыстарының орындалу барысын да бақылады.

Қала әкімі аталған жұмыстардың жүру қарқыны мен сапасы тікелей бақылауында екенін, барлық жауапты мекемелерге белгіленген жоспарларды сапалы іске асырып, тұрғындардың өмір сүру сапасын арттыруға бағытталған жұмыстарды жүйелі түрде жалғастыруды тапсырды.

Сапалы тұрғын үй – қазіргі қоғамның айнымас әрі аса маңызды бөлігі. Ол тек баспана ғана емес, адамның өмір сүру сапасын, денсаулығын, қауіпсіздігін және әлеуметтік тұрақтылығын айқындайтын негізгі факторлардың бірі болып табылады. Тұрғын үйдің сапасы жоғары болған сайын, қоғамның да даму деңгейі артып, азаматтардың әл-ауқаты жақсара түседі.
Ең алдымен, сапалы тұрғын үй адам денсаулығына тікелей әсер етеді. Жылы, жарық, таза әрі инженерлік жүйелері дұрыс жұмыс істейтін үйде тұру адамның физикалық және психологиялық жағдайын жақсартады. Ал керісінше, сапасыз, ескі немесе талапқа сай салынбаған үйлер түрлі аурулардың туындауына, күйзеліс пен әлеуметтік қиындықтарға себеп болуы мүмкін. Сондықтан тұрғын үй сапасы – халық денсаулығының маңызды көрсеткіші.
Сонымен қатар, тұрғын үйдің сапасы қоғамдағы әлеуметтік теңдік пен тұрақтылыққа ықпал етеді. Қолжетімді әрі қауіпсіз үйлердің көптеп салынуы халықтың өмір сүру деңгейін теңестіруге, әлеуметтік шиеленісті азайтуға мүмкіндік береді. Мемлекет тарапынан тұрғын үй бағдарламаларының жүзеге асырылуы жастарға, көпбалалы отбасыларға және әлеуметтік осал топтарға үлкен қолдау болып табылады.
Қазіргі заманда сапалы тұрғын үй экологиялық талаптарға да сай болуы тиіс. Энергия үнемдейтін технологиялар, экологиялық таза құрылыс материалдары және инфрақұрылымы дамыған аудандар болашақ ұрпақ үшін қолайлы орта қалыптастырады. Бұл – тұрақты дамудың маңызды бөлігі.
Қорытындылай келе, сапалы тұрғын үй – қоғам дамуының негізі. Ол адамның жеке өміріне ғана емес, тұтас елдің әлеуметтік-экономикалық жағдайына әсер етеді. Сондықтан тұрғын үй құрылысының сапасына мән беру, оны қолжетімді ету – мемлекет пен қоғамның ортақ міндеті.