ҚАУІПСІЗ ОРТА – САНАЛЫ ҰРПАҚ КЕПІЛІ.Жаңа оқу жылы қарсаңында құқық бұзушылықтың алдын алу, жасөспірімдер қауіпсіздігін қамтамасыз ету және өскелең ұрпақты ұлттық құндылықтарға негізделген рухани-адамгершілік бағытта тәрбиелеу мақсатында кездесу өтті.
Іс-шараны Кентау қаласы әкімінің орынбасары Бауыржан Әбенұлы жүргізіп, жиынға қалалық прокуратура және полиция бөлімінің өкілдері, білім саласының мамандары, мектеп директорлары мен тәрбие ісі жөніндегі орынбасарлар, педагог-психологтар, теолог, мешіт имамы, ата-аналар және жастар қатысты.
Кездесуде жаңа оқу жылындағы тәрбие және профилактикалық жұмыстар, жасөспірімдер арасындағы құқық бұзушылықтың алдын алу мәселелері талқыланды.
Кентау қалалық білім бөлімінің психология саласының әдіскері Замира Нұрдәулетқызы, полиция бөлімінің қоғамдық қауіпсіздік және кәмелетке толмағандардың ісі жөніндегі бөлім бастығы Ахметов Жанболат Саруарұлы, сондай-ақ «Кентау қалалық Руханият орталығы» КММ директоры Қайырбеков Әділбек Алиакбарұлы өз бағыттары бойынша баяндама жасап, бала тәрбиесінде отбасы, мектеп және қоғамның бірлескен жұмысының маңыздылығына тоқталды.
Жиын барысында пікір алмасып, сұрақ-жауап ұйымдастырылды. Қорытынды сөзді Кентау қалалық Аналар кеңесінің мүшесі Дәрібаева Бибі Еркінбекқызы сөйлеп, ұрпақ тәрбиесіндегі отбасы мен қоғамның жауапкершілігін атап өтті.
Қауіпсіз мектеп – қауіпсіз орта. Қауіпсіз орта – саналы ұрпақтың негізі!
