
Корея Республикасының Пхохан қаласынан келген делегация Түркістан қалалық емханасына жұмыс сапарымен келді. Сапар барысында қонақтар емхананың қызметімен, медициналық көмекті ұйымдастыру жүйесімен, цифрландыру бағытындағы жобалармен және пациенттерге көрсетілетін қызметтердің сапасымен танысты.Кездесу аясында денсаулық сақтау саласындағы өзара ынтымақтастықты дамыту, медициналық туризмді өркендету, заманауи медициналық технологияларды енгізу және тәжірибе алмасу мәселелері талқыланды. Сондай-ақ делегация мүшелеріне емхананың құрылымы, материалдық-техникалық базасы және жүзеге асырылып жатқан инновациялық жобалар таныстырылды.Шетелдік қонақтар емхананың дәрігерге дейінгі қызмет көрсету сапасын бағалап, пациенттерді қабылдау мен бағыттау үдерістерінің барысын көрді. Сонымен қатар алғашқы медициналық-санитариялық көмектің қолжетімділігіне, пациенттерге қызмет көрсету мәдениеті мен медициналық көмекті ұйымдастырудың жоғары деңгейіне оң баға берді.Емханада іске қосылған жасанды интеллект негізіндегі «Әсел» виртуалды көмекшісінің жұмысы мен пациенттердің өзіне-өзі қызмет көрсетуіне арналған интерактивті тақтаның мүмкіндіктері делегация назарына ұсынылды.
