Конго-Қырым геморрагиялық қызбасының (ҚҚГҚ) алдын алудың егілетін сенімді вакцинасы жоқ болғандықтан, негізгі шара – кене шағудан және жұқтырылған мал санымен жанасудан катаң қорғану.Конго-Қырым геморрагиялық қызбасы – адам өміріне қауіп төндіретін, кенелер арқылы таралатын аса қауіпті жұқпалы вирустық ауру. Бұл дерт дене қызуының күрт көтерілуімен, ағзаның улануымен және ауыр жағдайларда қан кету белгілерінің пайда болуымен сипатталады. Аурудың алдын алу – әрбір азаматтың денсаулығын қорғаудағы маңызды міндет.
Аурудың негізгі тасымалдаушысы – иксод кенелері. Адамға вирус көбіне ауру жұқтырған кененің шағуы арқылы беріледі. Сонымен қатар ауру малдың қанымен және тіндерімен қорғаныш құралдарынсыз жұмыс істегенде немесе науқас адамның қаны мен биологиялық сұйықтықтары арқылы да жұғуы мүмкін. Сондықтан малшылар, ветеринарлар, медицина қызметкерлері және табиғат аясында жиі болатын адамдар сақтық шараларын қатаң сақтауы қажет.
Аурудың алғашқы белгілеріне дене қызуының көтерілуі, қатты бас ауруы, әлсіздік, бұлшықеттер мен буындардың ауыруы, жүрек айнуы және құсу жатады. Ауыр жағдайда мұрыннан, қызыл иектен немесе басқа мүшелерден қан кетуі, теріде қанталаулар пайда болуы мүмкін. Мұндай белгілер байқалса, уақыт жоғалтпай медициналық көмекке жүгіну керек. Өз бетінше емделу қауіпті.
Конго-Қырым геморрагиялық қызбасының алдын алу үшін кене шағуынан қорғану маңызды. Табиғатқа, жайылымға немесе мал қорасына барғанда денені толық жабатын ашық түсті киім киіп, шалбардың балағын шұлықтың ішіне салған жөн. Кенеге қарсы арнайы репелленттерді нұсқаулыққа сәйкес пайдалану қажет. Серуеннен кейін денені, киімді және балалардың терісін мұқият тексерген дұрыс.
Кене жабысқан жағдайда оны жалаң қолмен жаншуға, май немесе басқа сұйықтық құюға болмайды. Мүмкіндігінше медициналық мекемеге жүгіну қажет. Кене шаққаннан кейін дене қызуы көтерілсе немесе әлсіздік байқалса, дәрігерге кене шаққанын міндетті түрде айту керек.
Мал сою, мал күту және жануарлардың қанымен жұмыс істеу кезінде қолғап пен арнайы қорғаныш киімін пайдалану қажет. Ауруға күдік туған жағдайда науқаспен байланыста болған адамдар да медициналық бақылаудан өтуі тиіс.
Қорытындылай келе, Конго-Қырым геморрагиялық қызбасы – алдын алу шараларын сақтауды талап ететін қауіпті инфекция. Жеке тазалықты сақтау, кенеден қорғану, ауру белгілерін ерте анықтау және дәрігерге уақытында қаралу адам өмірін сақтап қалуға көмектеседі. Әрбір азаматтың сақтығы – қоғам денсаулығының кепілі.
