Түркістан облысынан су тасқынына күрес үшін Атырау облысына 160-қа жуық ауыр жүк көлігі мен арнайы техника жолданды. Бұл техникалар өңірдегі Дарбаза, Түркістан, Манкент, Арыс станцияларында вагондарға тиеліп, Атырау станциясына жеткізіліп жатыр.
Техникаларды облыстағы құрылыс компаниялары, «Тұран су» мекемесі, «Қазатомөнеркәсіп» компаниясы, «Қазавтожол» мекемесі ұсынып отыр.
Еліміздегі аппатты жағдай орын алған өңірлерге облыс халқы, кәсіпкерлер, жастар көмек көрсетуде. Бұған дейін Түркістан облысынан су басқан өңірлерге 600 тоннаға жуық гуманитарлық көмек жіберілді. Еріктілер мен 150-ден астам кәсіби құтқарушы мен төтенше жағдай қызметкері апат аймағында жұмыс істеп жатыр.
Көмек көрсету жұмыстары тоқтамайды.
