Түркістан қаласында әлеуметтік маңызы бар нысандардың құрылысы жалғасып жатыр. Құрылыс барысы жіті бақылауда.
Мемлекет басшысы Қасым-Жомарт Тоқаевтың тапсырмасымен Түркістанда Достық үйі ғимаратының құрылысы басталған. Нысанды биыл пайдалануға беруді жоспарлап отыр. Құрылыс алаңын Түркістан облысының әкімі өзі аралап, жүргізіліп жатқан жұмыстарды бақылады. Мердігерлермен кездесіп, сапаға, ішкі дизайнына ерекше мән беруді тапсырды.
Қазіргі уақытта нысанның кірпіші қаланып, сыртқы инженерлік желілері толық жүргізілген. Этносаралық татулықтың ұйытқысына айналатын жаңа ғимаратта Ассамблея, этномәдени бірлестіктер орналасады.
Бұдан бөлек, Түркістан қаласының әкімшілік-іскерлік орталығында 5 қабатты 20 тұрғын үйдің құрылысы жүріп жатыр. Құрылыс алаңдарын аралап, мердігерлерге тапсырмалар берілді. Жергілікті кәсіпкерлерді қолдап, қажетті құрылыс материалдарды жергілікті шеберлерден сатып алуларын ескертті. Бұл үйлерге келешекте 2 мыңнан астам отбасы қоныстанады.
Түркістан қаласы халықты баспанамен қамту бағытында елімізде алдыңғы қатарда екенін айтып өткен жөн. Облыс құрылғаннан бері өңірде 40 мыңға жуық отбасы қоныс тойын тойлады. Жаңа шағын аудандар пайда болып, тозығы жеткен тұрғын үйлер ретке келтірілді. Жұмыстар жалғасады. Биыл бюджет есебінен 41, жеке инвесторлар есебінен 24 көпқабатты тұрғын үй салу жоспарлануда. Сонымен қатар осы жылы жалпы 191 үй салу жоспары бекітілді. Бүгінде 159 тұрғын үйдің құрылысы жүргізіліп жатыр. Оларды жыл соңына дейін пайдалануға беруді жоспарлап отыр.
