ЖАСТАРҒА ҚОЛДАУ КӨРСЕТІЛІП, ҮЗДІКТЕР МАРАПАТТАЛДЫ
Сауран ауданы құрылғалы бері жастар саясатын белсенді түрде жүзеге асырып келеді. Қазіргі таңда ауданда 14-35 жас аралығындағы жастар саны 33 404 адамды құрайды, бұл аудан халқының 32,1%-ын алады. Осы уақыт ішінде аудандық Жастар ресурстық орталығы жастардың әлеуметтік, мәдени және кәсіби дамуына арналған көптеген маңызды шараларды ұйымдастырып, жастарды қолдауға бағытталған жұмыстарды атқарды.
Жастар – еліміздің болашағы, рухани тәуелсіздігіміздің негізі.Мемлекет басшысы Қасым-Жомарт Тоқаев жастарға қолдау көрсету, олардың әлеуметтік және кәсіби мүмкіндіктерін кеңейту мәселесіне ерекше назар аударуды тапсырды. Президенттің айтуынша, жастар — елдің болашағы, сондықтан олардың білім алуына, жұмысқа орналасуына және жеке бастамаларын жүзеге асыруына жағдай жасау мемлекеттің басты міндеттерінің бірі.
Жастарға арналған бағдарламалар
Президент жастарды қолдау мақсатында бірқатар тиімді бағдарламалар мен жобаларды іске асыруды талап етті. Олардың ішінде:
Білім беру мүмкіндіктерін кеңейту: Мемлекеттік гранттар санын арттыру және заманауи мамандықтарға оқыту.
Жұмысқа орналасу: Жастарды жұмыспен қамту бағдарламаларын жетілдіру және кәсіптік тәжірибе өтуге мүмкіндік беру.
Кәсіпкерлікті қолдау: Жас кәсіпкерлерге жеңілдетілген несие мен гранттар ұсыну.
Мемлекет басшысының пікірі
«Жастарға инвестиция салу — еліміздің ертеңіне салынған инвестиция. Олар тек ел экономикасының қозғаушы күші ғана емес, мәдени және әлеуметтік дамудың да негізі. Біз олардың жан-жақты дамуына қажетті барлық жағдайды жасауымыз керек», — деді Президент.
Бұл тапсырмалар аясында мемлекеттік органдар мен жергілікті атқарушы билік жастарға арналған бастамаларды күшейтіп, олардың толыққанды дамуына ықпал ететінін мәлімдеді.
Олардың білімді, білікті, патриоттық рухта тәрбиеленуі – Қазақстанның тұрақты дамуының негізі. Мемлекет жастардың дамуына ерекше көңіл бөліп, білім беру, жұмысқа орналасу, кәсіпкерлікті қолдау сияқты бағыттарда түрлі бағдарламаларды іске асыруда.
Ал, жастар саясаты мен азаматтық қоғамды қалыптастыруға өз үлесін қосқан, ғылым, саясат, өнер, спорт және басқа да салаларда жетістіктерге жеткен жастарды қолдау мақсатында «Жыл үздігі-2024» байқауы ұйымдастырылды. Аудан әкімі М.Таңғатаров марапаттау рәсімінде кәсіби және қоғамдық қызметте жоғары жетістіктерге жеткен жастарды және жастар ұйымдарының көшбасшыларын алғыс хаттармен және арнайы сыйлықтармен марапаттады.
“Бүгін біз үшін маңызды әрі ерекше күн. Сауран ауданында өз саласында үздік нәтиже көрсеткен, еңбегімен өзгелерге үлгі болған азаматтарды атап өтіп, оларды марапаттау үшін жиналып отырмыз. Бүгінгі “Жыл үздігі” шарасы — біздің ауданымыздағы әрбір еңбеккердің, әрбір азаматтың жасампаз еңбегінің бағаланатын сәті.
Құрметті марапатқа ие болған азаматтар! Сіздер өз жұмыстарыңызда жоғары жетістіктерге жетіп, ауданымыздың дамуына елеулі үлес қосып келесіздер. Сіздің қажырлы еңбегіңіз бен кәсібилігіңіз – ауданымыздың өркендеуінің кепілі. Біз сіздердің осы табыстарыңызды атап өтіп, алдағы уақытта да үлкен жетістіктерге жетулеріңізге тілектеспіз!”- деді аудан әкімі Мақсат Таңғатаров.
«Жыл үздігі-2024» байқауының жеңімпаздары:
1. Үздік жас мұғалім – Табынбаев Олжас Құрбанәліұлы;
2. Үздік жас ЖРО маманы – Сарсенбаев Асан Сейдуллаұлы;
3. Үздік жас спортшы – Тұрсынбай Елдар Жұмамұратұлы;
4. Үздік жас кәсіпкер – Мавленов Элзод Лазизович;
5. Үздік жас жыл белсендісі – Жақып Ақбөпе Маратқызы;
6. Үздік жас медицина қызметкері – Аяғанова Айдана Байдуллақызы;
7. Үздік мемлекеттік қызметкер – Сайлау Жанболат Бауыржанұлы;
8. Үздік жас отбасы – Бейсенбиевтер отбасы
9. Үздік жас полиция қызметкері – Абдіқадір Рамазан Қойшыбайұлы;
10. Үздік жас ақын – Бұхарбаев Ердәулет Айнабекұлы;
11. Үздік талантты жас – Бәйтен Айнұр Дәулетқызы;
12. Үздік жас көшбасшы – Ермахан Арайлым Саматқызы;
13. Үздік жас студент – Бахтияров Диербек Улуғбекұлы;
14. Үздік жас мәдениет қызметкері – Омаркулов Рахимжан Суанханович;
15. Үздік жас шығармашылық ұжым – «Ташенев домбырашылары» ұжымы, жетекшісі Әбілдахан Ұлжалғас Жұмабекқызы;
16. Үздік жас ерікті – Нұрынбетов Алмат Балтабайұлы;
17. Үздік жас оқытушы – Усаров Бехруз Мунирович.
Барша жеңімпаздарды және жетістіктерге жеткен аудан жастарын шын жүректен құттықтаймыз! Болашақта да жастарға сенім артып, олардың елдің өркендеуі жолындағы еңбегін жоғары бағалаймыз.
