БИЫЛ ТҮРКІСТАН ОБЛЫСЫНДА 34 МЫҢҒА ЖУЫҚ ТҮЛЕК 11 СЫНЫПТЫ ТӘМАМДАЙДЫ.
Биыл Түркістан облысында 34 мыңға жуық оқушы 11 сыныпты тәмамдайды. Олардың ішінде 2 313 оқушы «Алтын белгіге», ал 2 400-і «Үздік аттестатқа» үміткер. Бұл туралы бүгін Түркістан облысының Өңірлік коммуникациялар қызметінде өткен баспасөз жиынында Түркістан облысының білім басқармасының міндетін атқарушы Қасымбекова Айгүл мәлімдеді.
Брифинг барысында мектепті бітіру шарасының алгоритмі баяндалды. Биыл ҚР Оқу-ағарту министрлігінің бұйрығына сәйкес оқу жылы 34 аптаға жалғасып, 25 мамырда аяқталады. 23 мамыр күні барлық 1-11 сынып оқушылары үшін «Білімім – Отаныма» тақырыбында бірыңғай сынып сағаты өткізіледі. Бұл оқушылардың жыл бойы алған білімін қорытындылап, отансүйгіштікке тәрбиелеуге бағытталған.
Айта кетерлігі, 11-сынып түлектері үшін мектеп бітіру іс-шарасы 23 мамырда барлық мектептерде өтеді. Қорытынды мемлекеттік емтихандар 9- сыныптар үшін 29 мамыр мен 10 маусым аралығында, ал 11-сыныптар үшін 30 мамыр мен 16 маусым аралығында ұйымдастырылады. Сондай-ақ, осы жылы облыс бойынша 27 386 түлек тест тапсырады. Облыста 5 тестілеу пункті жұмыс істеп тұр.
Айгүл Ерғалиқызы БАҚ өкілдерімен өткен пресс-конференцияда 2024-2025 оқу жылын жетістікке толы жыл болғанын мәлімдеп, бірқатар жағымды ақпараттармен бөлісті
— Білім сапасындағы жетістіктерге тоқталар болсақ, 2024-2025 оқу жылы облысымыз үшін табысты жыл болды. Жалпы білім беретін пәндер бойынша республикалық олимпиадаларда 12 алтын, 16 күміс, 27 қола медаль иеленді. Сонымен қатар, 5 мектеп үздік олимпиадалық мектептер қатарына енсе, «Зерде» республикалық жобалар конкурсында 9 жүлделі орынды иеленді. Гуманитарлық және жаратылыстану бағытындағы республикалық байқауларда оқушыларымыз 100-ге жуық жүлделі орынмен оралды.«XXI ғасыр көшбасшысы» зияткерлік сайысында облыс оқушылары алтын мен күміс медальдарға ие болды
Білім саласындағы инфрақұрылым жұмыстары қарқынды жүргізілуде. Мемлекет басшысының тапсырмасына сай, облыста 2025-2027 жылдары 115 мектеп жаңғыртудан өтеді. Биыл 41 мектепке қайта жөндеу жұмыстары жүргізіледі. Бұл — ауылдағы баланың да қаладағы замандасымен тең дәрежеде білім алуына жол ашады.
Сонымен қатар, өңірде педагогтерді қолдау мақсатында 2024 жылы 17 548 педагог біліктілігін арттырса, 2025 жылы 17 121 педагог қамтылады. Қазірдің өзінде 3 889 маман курстан өтті.
Бұдан бөлек, Айгүл Ерғалиқызы оқу жылын сәтті аяқтау және балалардың жазғы демалысы мен жазғы сауықтыруын сапалы ұйымдастыру, қауіпсіздігін қамтамасыз ету мәселесіне жауапкершілікпен қарау қажеттігін және осы бағытта атқарылып жатқан жұмыстар басқарма тарапынан үздіксіз бақылауда екендігін жеткізді.
Осылайша, Түркістан облысының білім беру саласында жүйелі реформалар мен нәтижелі жұмыстар жүргізілуде.
