22.05.2025 ж. күні Түркістан облысының ішкі істер департаментінің ұйымдастыруымен «Балаларды қорғау күніне» орай жоспар бойынша департамент басшысы генерал майор Кабденов Мұраттың басшылығымен облыс көлемінде іс шара ұйымдастырылды. Балаларды қорғау күнінің мақсаты — балалардың өмір сүруге, пікір бостандығына, білім алуға және қорғауға құқығы бар екенін еске салу.
Балалар — еліміздің болашағы, ұлтымыздың үміті. Олардың дені сау, білімді, тәрбиелі болып өсуі — әрбір отбасының, қоғамның және мемлекеттің басты міндеттерінің бірі. Сондықтан бұл күн — үлкендер үшін балаларға деген сүйіспеншілікті білдіріп қана қоймай, олардың қауіпсіздігін, еркіндігін, құқықтарын қорғау қажеттігін тағы бір мәрте еске салатын күн.
Бұл мереке әлемнің көптеген елдерінде кең көлемде аталып өтеді. Қазақстанда да 1 маусым — балалар үшін түрлі мерекелік іс-шаралар, концерттер, ойын-сауық бағдарламалары ұйымдастырылатын шуақты күн. Саябақтарда балаларға арналған мерекелік қойылымдар, спорттық жарыстар мен шеберлік сағаттары өткізіліп, оларға қуаныш пен шаттық сыйланады.
Алайда бұл күн тек көңіл көтеру емес. Бұл — балаларды қорғаудың, олардың өмірін жақсартудың маңыздылығын түсіну, әрбір баланың қауіпсіз, бақытты ортада өсуіне үлес қосу күні. Балаларға қуаныш сыйлау — үлкендердің парызы. Олар махаббат пен қамқорлыққа толы әлемде өмір сүруге лайық.
Іс-шараға Кентау қаласынан Ә. Молдағұлова атындағы № 19 ақпараттық технологиялар мектеп-лицейінен 30 оқушыдан тұратын кадет сыныбы қатысты. Қалалық полиция бөлімінің полиция под полковнигі Апашов Сапархан, мектептің алғашқы әскери дайындық пән жетекшісі Қалқожа Қанат және педагог- ұйымдастырушы Е. Байтемировтар кадет сыныбына жетекшілік жасап түрлі іс шаралардың көрінісін тамашалады. Сондай-ақ облыстық департаменттің ұйымдастыруымен оқушыларға асфальтқа сурет салу конкурсын өткізілді. Жеңімпаз оқушыларға бағалы сыйлықтар табыс етілді.
