Түркістан облысының денсаулық басқармасына қарасты,Созақ Аудандық Орталық Ауруханасы, «Өмір – ең қымбат сый» атты суицидтің алдын алу мақсатындағы семинар өтті.

Күні кеше, медицина қызметкерлері арасында маңызды семинар ұйымдастырылды. Семинардың тақырыбы — «Өмір – ең қымбат сый», оның мақсаты — суицидтің алдын алу, қоғамда психологиялық қолдауды күшейту және зардап шеккендерге көмек көрсету жолдарын талқылау.

Семинарды САОА психолог маманы Сырғабаева Ақбота жүргізді. Психолог өз тәжірибесімен бөлісіп, суицидтің белгілері мен оның алдын алу жолдары, психологиялық көмек көрсету әдістері жайлы ақпарат берді.Суицид – бұл адамның өз еркімен өміріне қол сұғуы, яғни өз-өзіне қол жұмсауы. Бұл күрделі және ауыр мәселе, оған түрлі себептер әсер етеді: психологиялық күйзеліс, жалғыздық, қоғамдағы түсінбеушілік, отбасылық қиындықтар, зорлық-зомбылық, материалдық тапшылық және тағы басқа. Әсіресе жастар арасында суицид мәселесі алаңдатарлық деңгейге жетіп отыр.

Адамның мұндай шешімге келуіне көбінесе күйзеліс, үмітсіздік, өзін керексіз сезіну себеп болады. Кейде суицид жасағысы келетін адам ішкі жан айқайын сыртқа шығара алмай, үнсіз қиналады. Сол себепті айналамыздағы адамдардың көңіл-күйіне назар аудару өте маңызды. Қарапайым қолдау, жылы сөз, шынайы әңгіме олардың өмірін сақтап қалуы мүмкін.

Мұндай жағдайдың алдын алу үшін отбасы, мектеп, қоғам бірлесіп жұмыс жасауы қажет. Балалармен ашық сөйлесу, олардың ішкі әлемін түсінуге тырысу, психологиялық қолдау көрсету – бұл үлкен көмек. Сондай-ақ, психолог мамандардың көмегіне жүгіну де тиімді тәсілдердің бірі.

Суицид – шешім емес. Өмірде қиындықтар болғанымен, олардан шығатын жол әрқашан бар. Әр адамның өмірі қымбат, және оны сақтап қалу – баршамыздың міндетіміз. Егер жанымыздағы адам көмекке мұқтаж болса, бейжай қарамай, оған тірек бола білейік.

Бұл семинар медицина қызметкерлері үшін маңызды болды, өйткені олар жиі ауыр психологиялық жағдайларды көріп, көмек көрсетуге тура келеді. Тақырыпты тереңнен түсіну — әр адамның өміріне әсер етуі мүмкін.

Әрқайсымыздың қолымыздан келетін нәрсе — көмек сұраған адамға жан-жақты қолдау көрсету. Өміріміздегі ең үлкен сый — ол өзіміз бен жақындарымыздың амандығы!