ЖЕТІСАЙЛЫҚ ДӘРІГЕРЛЕР КҮРДЕЛІ ОРТОПЕДИЯЛЫҚ ОТАНЫ СӘТТІ ЖАСАДЫ.

Жетісай аудандық орталық ауруханасының жарақат бөлімінде ауыр жарақатпен түскен 1971 жылы туған науқас Захед Джемиле Яхиаға күрделі ота жасалды. Науқас тұрмыстық жарақат салдарынан сол жақ балтыр сүйектерін орнынан ығысқан түрде сынған. Қосалқы диагноздары: 2-типтегі қант диабеті, ауыр дәрежедегі созылмалы бүйрек жетіспеушілігі және ИПФ декомпенсация сатысында.

Ота бел-жұлын жансыздандыру тәсілі арқылы өткізілді. Мамандар алғаш рет “жабық түрде балтыр сүйектерін блокталатын интрамедуллярлық штифт пен арнайы винттер арқылы қалпына келтіру (репозиция)” отасын сәтті орындады. Бұл — Жетісай аудандық орталық ауруханасында жасалған алғашқы күрделі ортопедиялық оталардың бірі.

Науқастың отадан кейінгі жағдайы бірқалыпты. Қазіргі таңда балдақпен жүріп-тұруға жарамды. Егер жағдайы алдағы 2-3 күн ішінде тұрақты болса, амбулаторлық емге үйіне шығарылуы жоспарланып отыр.

Бұл — Жетісайлық дәрігерлердің кәсіби шеберлігінің, біліктілігінің тағы бір дәлелі.Ортопедия — бұл тірек-қимыл жүйесінің ауруларын, жарақаттарын, олардың алдын алу, диагностикасы және емдеуімен айналысатын медицина саласы. Бұл сала сүйектердің, буындардың, бұлшықеттердің, байламдардың, сіңірлердің және омыртқа жотасының құрылымдарына қатысты патологияларды зерттейді. Ортопед-дәрігерлер туа біткен немесе жүре пайда болған ақауларды, сынықтарды, буын шығуларын, остеохондроз, артрит, артроз, сколиоз секілді ауруларды емдейді. Сонымен қатар, спорттық жарақаттар, кәсіби қызметке байланысты қозғалыс бұзылыстары да ортопедия аясында қарастырылады. Емдеу әдістері консервативті (дәрі-дәрмекпен, физиотерапиямен, ортопедиялық құралдармен) және хирургиялық (жасанды буын салу, сүйек қалпына келтіру) болып бөлінеді. Қазіргі таңда ортопедияда заманауи технологиялар, мысалы, артроскопия, 3D-протездеу, лазерлік терапия кеңінен қолданылады.