Неонатальды реанимация (NRP), Ауыр жарақатты травма кезіндегі ауруханаға дейінгі көмек (PHTLS), Ауруханадағы медициналық сұрыптау – Триаж жүйесі (TRIAGE) тақырыптарында Түркістан қалалық балалар ауруханасында маңызды оқыту шарасы өткізілді. Оқыту барысында халықаралық нұсқаушылар: Алиева Айнур Саматовна Джангазиев Шынгыс Бауыржановичөздерінің жоғары біліктілігі мен тәжірибесіне сүйене отырып, қатысушыларға заманауи хаттамалар мен шұғыл жағдайларда көмек көрсету алгоритмдерін үйретті. Оқыту бағдарламасының негізгі мақсаты — медицина қызметкерлерінің біліктілігін арттыру, ауыр жағдайдағы науқастарға жедел әрі тиімді көмек көрсетуге дайын болуын қамтамасыз ету. Халықаралық стандарттарға негізделген бұл тренингтер пациенттердің қауіпсіздігін арттыруда және медициналық көмектің сапасын жақсартуда үлкен рөл атқарады.
Неонтальды реанимация — бұл жаңа туған нәрестелердің өміріне қауіп төнген жағдайда тыныс алуын және жүрек соғысын қалпына келтіруге бағытталған шұғыл медициналық көмек көрсету кешені. Бұл процесс әсіресе шала туған, босану кезінде асқынулары бар немесе туа біткен патологиялары бар нәрестелер үшін өте маңызды. Неонтальды реанимация — перинаталдық медицинаның маңызды саласы, себебі алғашқы минуттарда көрсетілген көмек нәрестенің өмірі мен болашақ дамуына тікелей әсер етеді.
Жаңа туған нәрестелердің шамамен 10%-ы босанғаннан кейін қосымша тыныс алу көмегін қажет етеді, ал 1%-ына толыққанды реанимациялық шаралар қажет болады. Сондықтан әрбір босану бөлімінде реанимацияға қажетті жабдықтар мен дайын мамандар болуы шарт. Реанимацияның сәттілігі нәрестенің жағдайын уақытында бағалап, шұғыл түрде дұрыс әрекет етуге байланысты.
Нәрестенің жағдайын бағалау
Нәресте туылғаннан кейін бірден 1 минут ішінде оның жағдайы Апгар шкаласы бойынша бағаланады:
Жүрек соғысы (пульс)
Тыныс алу жиілігі және сапасы
Бұлшық ет тонусы
Рефлекстік реакциялар (тітіркендіргішке жауап)
Тері түсі
Егер баланың Апгар ұпайы 7–10 болса, ол жақсы жағдайда деп саналады және қосымша реанимация қажет емес. 4–6 ұпай — орташа ауырлықтағы жағдай, ал 0–3 ұпай — ауыр жағдай, шұғыл реанимацияны талап етеді.
Неонтальды реанимацияның кезеңдері
1. Бастапқы шаралар (әр нәрестеге қажет):
Жылу сақтау (сәби денесін құрғатып, жылы көрпеге орау).
Тыныс жолдарын тазарту (мұрын және ауыз қуысын арнайы аспиратормен сору).
Бас пен мойынды дұрыс қалыпқа келтіру (тыныс алуға ыңғайлы қалып).
Қажет болса, тактильді стимуляция (арқасынан жеңіл шапалақтау немесе табанын уқалау).
2. Вентиляция:
Егер алғашқы шаралардан кейін нәресте тыныс алмаса немесе жүрек соғысы минутына 100 реттен төмен болса, бетперде арқылы өкпені оң қысыммен желдету (ИВЛ) жүргізіледі. Бұл ең маңызды әрі тиімді қадамдардың бірі.
3. Жүрек массажы:
Егер жүрек соғысы 60 реттен төмен болса, жасанды тыныс алумен қатар, көкірек тұсынан екі саусақпен немесе екі қолдың бас бармағымен жүрекке жанама массаж жасалады (3 рет массаж : 1 рет тыныс).
4. Медикаментозды ем:
Егер жоғарыда аталған шаралар көмектеспесе, дәрі-дәрмектер (мысалы, адреналин, глюкоза, натрий бикарбонаты) көктамыр ішіне немесе кіндіктік венаға енгізіледі.
Жабдықтар мен мамандар
Неонтальды реанимация үшін арнайы жабдықтар қажет:
Реанимациялық үстел (жылытқышпен)
Қол аспираторы немесе электрлі сорғыш
Бетперде және ауа жіберетін баллон
Пульсоксиметр, оттегі көзі
Дәрілік заттар және көктамыр ішіне енгізу жиынтығы
Медициналық қызметкерлер неонтальды реанимация бойынша арнайы оқытудан өтуі тиіс. Команда құрамында неонатолог дәрігер, акушер, мейіргер немесе анестезиолог болуы қажет.
Неонтальды реанимация — жаңа туған сәбидің өмірін сақтау үшін маңызды шаралар жүйесі. Ол тез, дәл және үйлестірілген әрекеттерді қажет етеді. Әрбір босану бөлімшесінде дайын реанимациялық команда мен құрал-жабдықтар болуы — нәресте өлімін азайтудың және асқынулардың алдын алудың басты шарты. Уақтылы және тиімді көмек жаңа туған баланың болашағына үлкен әсер етеді.
