Төлеби аудандық ауруханасында семинар өтті.

Бүгін аудандық ауруханаға қарасты мектеп мейірбикелері арасында тәжірибе алмасу және кәсіби біліктілікті арттыру мақсатында семинар ұйымдастырылды.

Семинар барысында Біркөлік жалпы орта мектебінің медбикесі Торжанова Кеңескүл мен Т.Назарбеков атындағы мектеп медбикесі Ақылбекова Салтанат мектеп оқушыларын ыстық тамақпен қамтамасыз ету және оны ұйымдастырудың тиімді модельдері бойынша арнайы презентация дайындап, әріптестеріне таныстырды.

 Іс-шарада білім беру ұйымдарындағы тамақтануды ұйымдастыру, мектеп медицина қызметкерлерінің міндеттері мен функциялары талқыланып, оқушылардың денсаулығын нығайтудағы маңызды қадамдар айтылды.

Бұл семинар мектеп мейірбикелерінің кәсіби тәжірибесін арттырып қана қоймай, балалардың дұрыс тамақтануын қадағалаудағы ортақ жауапкершілікті күшейтті.

 Төлеби аудандық ауруханасы алдағы уақытта да мектеп мейірбикелерінің білімін жетілдіруге бағытталған осындай пайдалы кездесулерді тұрақты түрде өткізіп отыратын болады.Дұрыс тамақтану – адамның денсаулығын сақтаудың, өмір сүру сапасын арттырудың және ұзақ өмір сүрудің басты кепілі. Адам ағзасы күн сайын түрлі қоректік заттарға мұқтаж. Сол себепті тамақтану кезінде ағзаға қажетті ақуыздар, майлар, көмірсулар, дәрумендер мен минералдардың жеткілікті мөлшерде түсуі өте маңызды. Дұрыс тамақтану – тек ішіп-жейтін тағамның түрін таңдау емес, сонымен қатар оның мөлшері мен уақытын дұрыс жоспарлау болып табылады.

Адамның жасы, жынысы, еңбек түрі мен өмір сүру салтына байланысты тағам мөлшері мен құрамы да әртүрлі болуы керек. Мысалы, дене еңбегімен айналысатын адамдарға қуат беретін көмірсулар мен майлар көбірек қажет болса, ой еңбегімен шұғылданатын адамдарға жеңіл сіңетін, дәруменге бай тағамдар қажет. Балалар мен жасөспірімдерге ағзаның өсуіне қажет ақуыз бен кальций мол тағамдар, ал қарт адамдарға жеңіл әрі майсыз тағам түрлері ұсынылады.

Дұрыс тамақтанудың негізгі қағидаларының бірі – тамақты әртүрлі әрі табиғи өнімдерден әзірлеу. Көкөністер мен жемістер, ет пен балық, сүт өнімдері мен дәнді дақылдар күнделікті ас мәзірінде міндетті түрде болуы керек. Сонымен қатар, фастфуд, тәтті газдалған сусындар мен чипсы секілді зиянды тағамдардан аулақ болған жөн. Мұндай тағамдар ағзаны артық маймен, қантпен және тұзбен толтырып, әртүрлі аурулардың, соның ішінде семіздік пен қант диабетінің пайда болуына себеп болады.

Тамақтану режимін сақтау да маңызды. Күніне 3–4 рет белгілі уақыт аралығында тамақтанған дұрыс. Таңғы ас – ең маңызды тамақ, себебі ол күні бойғы энергия мен көңіл күйге әсер етеді. Кешкі ас тым ауыр болмауы тиіс және ұйықтардан кемінде екі сағат бұрын ішілгені жөн.

Дұрыс тамақтану адамның дене сымбатын сақтап қана қоймай, ойлау қабілетін жақсартып, иммунитетті күшейтеді. Денсаулық – баға жетпес байлық, ал оны сақтаудың ең қарапайым жолдарының бірі – тамақтану мәдениетін қалыптастыру. Сондықтан әр адам өз денсаулығына жауапкершілікпен қарап, дұрыс тамақтануды күнделікті өмірінің негізгі бөлігіне айналдыруы қажет.