Оқу-жаттығу Түркістан қаласы Төтенше жағдайлар басқармасының бастығы, азаматтық қорғау полковнигі Асқар Сейсеновтың басшылығымен өткізілді.Жер сілкінісі кезінде адамның дұрыс және жылдам әрекет етуі өмірді сақтап қалуда шешуші рөл атқарады. Мұндай табиғи апат кезінде ең бастысы — сабыр сақтау және қауіпсіз орын табу. Жер сілкінісі басталған сәтте дүрбелеңге бой алдырмай, дереу әрекет ету қажет. Егер сіз ғимарат ішінде болсаңыз, терезелерден, айналар мен шкафтардан алысырақ кетіңіз. Ең қауіпсіз жерлер — ішкі қабырғалар жанындағы бұрыштар, берік үстелдің асты немесе есік маңы. Үстіңізге құлап кетуі мүмкін ауыр заттардан аулақ болыңыз.
Электр жарығын, газды және суды дереу өшіріңіз, себебі діріл кезінде өрт немесе жарылыс қаупі туындауы мүмкін. Лифтіні пайдалануға қатаң тыйым салынады, себебі ол тоқтап қалуы немесе құлауы ықтимал. Егер ғимараттан шығуға мүмкіндік болса, баспалдақ арқылы тез, бірақ байсалды түрде сыртқа шығыңыз. Аулаға шыққан соң биік ғимараттардан, электр сымдарынан және ағаштардан қашық жерге барыңыз.
Ал егер жер сілкінісі кезінде далада болсаңыз, ашық кеңістікке тоқтаңыз, ғимараттардан, көпірлер мен бағандардан алыстау тұрыңыз. Көлік жүргізіп келе жатсаңыз, жолдың шетіне тоқтап, қозғалтқышты сөндіріңіз, бірақ көпір немесе тоннель астында тұрмаңыз.
Жер сілкінісі басылған соң өзіңіздің және айналаңыздағы адамдардың жағдайын тексеріңіз. Зардап шеккендер болса, алғашқы көмек көрсетіп, қажет болса жедел жәрдем шақырыңыз. Радио немесе ресми ақпарат көздері арқылы төтенше жағдай қызметтерінің нұсқауларын мұқият тыңдаңыз. Қайта сілкініс (афтершок) болуы мүмкін екенін естен шығармаңыз, сондықтан қауіпсіздік ережелерін сақтауды жалғастырыңыз.
Жер сілкінісіне алдын ала дайындық та өте маңызды. Үйде алғашқы көмек қобдишасын, фонарь, су және азық-түлік қорын сақтап қойған жөн. Сонымен қатар, отбасы мүшелерімен төтенше жағдай кезіндегі әрекет жоспарын алдын ала келісіп алған дұрыс. Осындай қарапайым сақтық шаралары жер сілкінісі кезінде өз өміріңізді және жақындарыңыздың өмірін сақтап қалуға көмектеседі.
