ИСЕСКО БАС ДИРЕКТОРЫ ТҮРКІСТАНҒА РЕСМИ САПАРМЕН КЕЛДІ.

Ислам әлеміндегі білім, ғылым және мәдениет мәселелері жөніндегі ұйым – ИСЕСКО-ның Бас директоры, доктор Салим бин Мұхаммед әл-Малик арнайы ресми сапармен Түркістанға келді.

Түркі және ислам өркениетінің алтын қазығы, мәдени-рухани орталығы саналатын — Түркістан қаласына ресми өкілдің алғашқы сапары. Қала басшылығы мәртебелі мейманды Қожа Ахмет Ясауи кесенесі, Визит орталық, «Ұлы Дала Елі» орталығы, Әл-Фараби кітапханасы, «Қожа Ахмет Яссауи» мұражайы және «Керуен сарай» кешенімен таныстырып, өзара ынтымақтастықты арттыру бағытында бірлескен жоспарларды талқылады.

Сапар барысында Түркістан қаласы әкімі Әзімбек Пазылбекұлы мен доктор Салим бин Мұхаммед әл-Маликты ресми кездесу өткізіп, Халықаралық қазақ-түрік университетінің студенттері мен профессор-оқытушылар құрамымен жүздесті.

Қожа Ахмет Ясауи ілімі ислам өркениетінде ерекше орын алады. Оның даналығы мен рухани мұрасы түркі халықтарының мәдениетін біріктіріп, адамгершілік пен имандылықты дәріптеуге бағытталған. Бүгінде бұл ілім жастарды тәрбиелеуде, қоғамның рухани бірлігін нығайтуда маңызды рөл атқарып келеді.

Сапардың маңызы зор: ол Қазақстанның ислам әлеміндегі мәдени және рухани көпір ретіндегі рөлін айқындайды.

Алдағы уақытта ИСЕСКО мен Қазақстан арасында білім, ғылым және мәдениет саласындағы ынтымақтастық кеңейіп, жаңа бірлескен жобалар жүзеге асырылмақ.