Сауран ауданы мен Түркістан, Кентау қалаларындағы жұмыссыз азаматтар мен жастарға арналған бос жұмыс орындары жәрмеңкесі өтті.

Шараға Түркістан облысы әкімінің орынбасары Бейсенбай Тәжібаев, Түркістан облысы жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева, басқарма басшысының орынбасары Самат Байғұтов және облыстық мәслихат депутаты Қалыйма Жантөреева қатысты.

Облыстық «Еңбек мобильділігі орталығының» ұйымдастыруымен өткен жәрмеңкенің басты мақсаты – өңір жастары мен жұмыссыз азаматтарды еңбек нарығына араластырып, жұмыс берушілер мен ізденушілер арасында тікелей байланыс орнату.

Жәрмеңкеге Сауран ауданы мен Түркістан, Кентау қалаларындағы 30 жұмыс беруші қатысып, 700-ден астам бос жұмыс орнын ұсынды. Нәтижесінде 300-ге жуық тұрғын жұмыс берушілермен тікелей сұхбаттасып, өз мамандығына сәйкес жұмыс табу мүмкіндігіне ие болды.

Бос жұмыс орындарының 445-і өнеркәсіп, 33- ауыл шарушылық, 150 — құрылыс, тұрғын үй коммуналдық шаруашылығы, 38 — білім, 14 — денсаулық сақтау, 96 — қызмет көрсету саласына тиесілі. Атап айтсақ, фармацевт, невропатолог, травматолог-ортопед, бала дәрігері, психолог, логопед, мәдени шаралар ұйымдастырушы, еңбек терапиясы жөніндегі инструктор, кітапханашы, вахтер, бағбан, электрик, шаштараз, су сорғы станциясы машинисі, санитар, инженер, аудармашы, есепші, заңгер, механик, электрик, дәнекерлеуші, жұмысшы, оператор, технолог, жүргізуші, педагог, тәрбиеші, тігінші, аспаз, лаборант, күзетші, қасапшы, IT-маман, программист және өзге де 70-тен астам мамандық ұсынылған.

Айта кетейік, жыл басынан бері өңірлік жұмыспен қамту карта аясында 74630 азамат тұрақты және субсидияланатын жұмыс орындарына жолданды. Оның ішінде тұрақты жұмыс орнына орналасқандар 36415, субсидияланатын жұмыс орындарына орналасқандар саны 38215 азамат.