МАҚТА ӨҢДЕУ ЗАУЫТЫНЫҢ ҚҰРЫЛЫСЫМЕН ТАНЫСТЫ.

Отырар ауданының әкімі Қайрат Жолдыбайұлы ауданда іске асып жатқан ауқымды инвестициялық жобалардың бірі – мақта өңдеу зауытының құрылыс жұмыстарымен танысты. Кәсіпорын өкілдерімен кездесіп, өндіріс орнының алдағы жоспарларын тыңдады.

Қазіргі таңда зауыттың ішкі құрылысы қарқын алып, мақтаны тазалау және шитінен ажырату қондырғылары орнатылуда. Нысан қазан айының соңына дейін толық аяқталып, пайдалануға беріледі деп күтілуде.

Аудан басшысы зауыт іске қосылған кезде негізгі жұмыстарға жергілікті тұрғындарды тарту, оларды жаңа технологияларды меңгеруге бейімдеу мәселесін басты назарда ұстау қажеттігін атап өтті.

Айта кету керек, Отырар ауданында қолға алынған бұл жоба «Түркістан мақта агроөнеркәсіптік кешені» ЖШС бастамасымен және «Түркістан» ӘКК» АҚ бірлесе жүзеге асырылуда. Бірегей жоба заманауи су үнемдеу технологияларын қолдана отырып, жоғары стандартты шикізат базасын қалыптастыруды, соңғы үлгідегі мақта өңдеу зауыттарын, тамшылатып суару таспаларын шығаратын өндіріс орнын және басқа да инфрақұрылымдық нысандарды қамтиды. Мұнда әкімшілік ғимараты, шаруашылық базасы, сорғы станциялары салынуда. Жалпы инвестициялық құны – 80 млрд тенгені құрайды.

Жоба арқылы қуаттылығы жылына 160 мың тонналық 4 заманауи мақта өңдеу зауытын іске қосу, 6 мың тонна мақта тұқымын шығаратын өндірістік желісін құру көзделген. Оның ішінде, биыл 2 зауыт іске қосылса, 2026 жылы тағы 2 зауытты іске қосу жоспарланып отыр.