АУДАНДА КӘСІПКЕРЛЕР КҮНІ АТАЛЫП ӨТТІ.
Бүгін ауданда кәсіпкерлер күніне арналған салтанатты іс-шара өтті. Іс-шараға аудан әкімінің орынбасары Тоқсейіт Елекеев, аудандық мәслихат төрағасы Уалихан Ұзақов, аудандық кәсіпкерлік және туризм бөлімінің басшысы Ержан Оралбай, «Атамекен» Ұлттық кәсіпкерлер палатасы Түркістан облысы Отырар аудандық филиалының директоры Ұлан Абдрахимов, сондай-ақ ауданның белсенді кәсіпкерлері мен қонақтар қатысты.
Мерекелік іс-шарада аудан әкімінің орынбасары Тоқсейіт Елекеев аудан кәсіпкерлерін кәсіби мерекелерімен құттықтап, ауданның әлеуметтік-экономикалық дамуына қосқан үлесін ерекше атап өтті.
Ол өз сөзінде: «Кәсіпкерлер – ел экономикасының тірегі, қоғам дамуының қозғаушы күші. Сіздердің табандылықтарыңыз бен іскерліктеріңіздің арқасында ауданда жаңа жұмыс орындары ашылып, халықтың әл-ауқаты артып келеді. Мемлекет тарапынан бизнеске жан-жақты қолдау көрсетіліп отыр. Осы мүмкіндікті тиімді пайдалана отырып, өңірдің өркендеуіне атсалысып жүрген барша кәсіпкерлерге алғыс айтамын», – дей келе бірқатар кәсіпкерлерге аудан әкімінің алғыс хаттарын табыс етті.
Сондай-ақ, мерекелік жиында аудандық мәслихат төрағасы Уалихан Ұзақов аудан экономикасының дамуына елеулі үлес қосқан кәсіп иелерінің кеудесіне «Отырар ауданының 90 жылдығы» мерекелік төсбелгісін тақты.
Кәсіпкерлерге құрмет көрсету рәсімінде кәсіпкерлік және туризм бөлімінің басшысы Ержан Оралбай мен «Атамекен» Ұлттық кәсіпкерлер палатасының аудандық филиалының директоры Ұлан Абдрахимов, кәсіпкерлер кеңесінің төрағасы Нұржан Орынбасар құттықтау сөз сөйлеп, сала мамандарын арнайы алғыс хаттармен марапаттады.
Айта кетусек, биылдан бастап 29 қазан ресми түрде Қазақстан кәсіпкерлері күні болып бекітілді. Бұл мерекенің дәл осы күнге белгіленуі тегін емес — 2015 жылғы 29 қазанда Қазақстан Республикасының Кәсіпкерлік кодексі қабылданған болатын. Кодекс еліміздегі бизнес жүргізу саласындағы негізгі қағидаттарды біріктіріп, кәсіпкерлікті мемлекеттік деңгейде қолдаудың жаңа тетіктерін қалыптастырған маңызды құжат саналады.
Мерекелік іс-шара соңында қатысушылар естелік суретке түсіп, аудан өнерпаздарының концерттік бағдарламасын тамашалады.
