1 Маусым – Балалар күніСауран ауданы білім бөліміне қарасты Ә.Сығай атындағы жалпы білім беретін мектебінде 1 маусым – Балаларды қорғау күніне орай ерекше қуаныш пен шаттыққа толы іс-шара өтті.
Іс-шарааны ашып беру үшін Шаға ауылдық округінің әкімі Жұманов Ырсқали Нұрғалиұлы сөз сөйледі.Мерекелік шара барысында ауылымыздың жүрегі кең, қамқор жанды кәсіпкері Тойманов Мақсат ағамыз мектепалды даярлық тобының балалары мен “Толағай” жаздық лагерінің оқушыларына ойыншықтар сыйға тартып, олардың жүздеріне шаттық пен қуаныш сыйлады.
Кәсіпкер Қалдыбеков Бағылан мырза мен Хакимов Хикмет мырзаның демеушілігімен жартылай жетім оқушыларымызға және қаржылай көмек көрсетті.
Сонымен қатар, балаларымызға Мұсабеков Қанатбай, Тәңірберген Рахманберді және кәсіпкер Әшірбеков Олжас ағайларымыз тәтті сусындар мен балмұздақтар таратты. Балалардың қуанышты күлкісі мен шынайы алғыстары бұл күнді ұмытылмас етіп, үлкендердің ізгі ісіне ризашылық сезімін арттырды.
Балалар – біздің болашағымыз, еліміздің ертеңі. Осындай шуақты күнде олардың бақытты сәттеріне себепші болған барша азаматтарға алғысымыз шексіз!Балаларды қорғау күні – әр жыл сайын 1 маусымда атап өтілетін халықаралық мейрам. Бұл күн балалардың құқықтарын қорғау, олардың қауіпсіз әрі бақытты өмір сүруіне жағдай жасау мақсатында ұйымдастырылады. Мейрам 1950 жылдан бастап аталып келеді және әлемнің көптеген елдерінде кеңінен танымал.
Балалар – қоғамның болашағы. Олардың жақсы тәрбие, сапалы білім алуына, денсаулығы мықты болып өсуіне барлық жағдай жасау – әрбір елдің басты міндеті. Балаларға қамқорлық – ата-ананың, мұғалімнің және бүкіл қоғамның ортақ жауапкершілігі.
Бұл күні балабақша мен мектептерде түрлі мерекелік шаралар, концерттер, спорттық жарыстар өткізіледі. Сонымен қатар, жетім және аз қамтылған балаларға қолдау көрсетуге арналған қайырымдылық акциялар ұйымдастырылады.
Балаларға мейірім, махаббат пен қамқорлық – олардың өмірге деген сенімін арттырады. Сондықтан 1 маусым – тек мейрам емес, әрбір ересек адам үшін үлкен жауапкершілік пен міндетті еске салатын күн.
