АРТЕРИАЛДЫ ГИПЕРТЕНЗИЯ ДЕНСАУЛЫҚ МЕКТЕБІ.

Ордабасы аудандық орталық ауруханасында кардиолог дәрігері Д.Б.Жумабаева “Жүрек- қантамыр аурулары. Атеросклероз” тақырыбы бойынша кезекті сабақтар өтті.

Атеросклероз — қан тамырларының ішкі бетіне холестериннің сіңіп, жиналып, түйін тәрізді шоғырланып қалуы. Холестерин сіңіп қалған орын бастапқы кезде сары жолақ дақ түрінде болса, келе-келе қатайған түйінге айналады. Бұл түйіндер бір-біріне қосылады. Соның салдарынан тамырдың ішкі қабатында жаралар пайда болады, кальций тұздары шөгіп, тамыры қатаяды, қан өтуі қиындайды. Атеросклероз денедегі ең ірі қан тамыры — қолқада жиі пайда болады. Атеросклероз салдарынан қолқаның жұқарған жерлері қалталанып кеңиді (аневризма) де, басқа мүшелердің қан тамырларын бекітіп тастайды. Соның әсерінен кейде науқастың бірнеше минут ішінде өліп кетуі мүмкін. Шажырқай артериясының атеросклерозы ішектің өлі еттенуіне, аяқ атеросклерозы аяқтың гангренасына соқтырады. Атеросклероз жүрек қыспасы (стенокардия), жүректің созылмалы ишемиялық ауруы, жүрек инфарктінің негізгі себебі болып есептеледі. Негізінен қарт кісілерде кездеседі. Атеросклероздың пайда болу себептеріне қан қысымының жоғары болуы, эндокриндік аурулар және семіру жатады.Эндокриндік ауру — бұл эндокриндік бездердің қызметі бұзылған кезде пайда болатын дерттер тобы. Оларға қант диабеті, гипотиреоз, гипертиреоз, акромегалия, бүйрек үсті бездерінің бұзылыстары жатады. Бұл аурулар гормондардың артық немесе жеткіліксіз бөлінуімен сипатталады. Белгілері — әлсіздік, тершеңдік, дене салмағының өзгеруі, жүрек соғысының жиілеуі. Ерте диагностика мен дұрыс ем – асқынуды болдырмаудың басты жолы. Атеросклероздың асқынған түрі хирургиялық емдеуді талап етеді. Атеросклероздан сақтану үшін дұрыс тамақтану, әсіресе, өсімдік майын пайдалану, спортпен шұғылдану керек.