БОЛАШАҚ МАМАНДАРҒА -БІЛІКТІ МАМАНДАРДАН БАҒЫТ.

Жетісай аудандық орталық ауруханасында болашақ медицина мамандарына арналған тәжірибелік сабақтар жалғасуда. Аталмыш бағыт аясында аурухананың бас мейіргері Базарбаева Асия Жетісай жоғары медициналық колледжінің бітіруші курс студенттеріне жеке қорғаныш құралдарын (ЖҚҚ) дұрыс кию және шешу тәртібі бойынша оқыту сабағын өткізді.

Сабақ барысында студенттерге инфекциялық қауіпсіздікті сақтау, қорғаныш киімдерін дұрыс пайдалану, медициналық стандарттар мен қауіпсіздік шараларын сақтау бағытында жан-жақты түсіндіру жұмыстары жүргізілді.

Жыл сайын Жетісай аудандық орталық ауруханасы оқу ордаларымен тығыз байланыста жұмыс істей отырып, жас мамандарға тәжірибе алаңын ұсынып келеді. Аурухана ұжымы студенттерге тек теориялық білімін нығайтып қана қоймай, практикалық дағдыларды да меңгеруге жағдай жасайды.

Болашақ мейіргерлер мен медицина қызметкерлерінің кәсіби дамуына үлес қосатын бұл үрдіс алдағы уақытта да өз жалғасын таба бермек.Мейіргерлер – денсаулық сақтау жүйесінің ең маңызды және жауапты мамандарының бірі. Олар адамның өмірі мен денсаулығын сақтауда, аурулардың алдын алуда, науқастарды емдеуде және оңалтуды қамтамасыз етуде шешуші рөл атқарады. Мейіргер тек медициналық көмек көрсетуші ғана емес, ол – адамға жан жылуын сыйлайтын, қиын сәтте қолдау білдіретін, рухани дем беретін тұлға.

Мейіргердің басты міндеті – дәрігердің нұсқауын орындап қана қоймай, науқастың жағдайын үнемі бақылап, оған күтім жасау, санитарлық-гигиеналық талаптардың сақталуын қамтамасыз ету. Сонымен қатар, мейіргерлер адамдарға салауатты өмір салтын қалыптастыру жөнінде кеңес береді, алдын алу шараларын түсіндіреді. Бұл олардың қоғам алдындағы үлкен әлеуметтік жауапкершілігін көрсетеді.

Қазіргі таңда мейіргерлер тек ауруханада ғана емес, мектептерде, балабақшаларда, өндіріс орындарында, әскери бөлімдерде және ауылдық жерлерде де қызмет атқарады. Олар тек науқастармен емес, әртүрлі жастағы адамдармен жұмыс істейді. Әсіресе ауылдық жерлерде мейіргерлердің еңбегі айрықша бағалы, себебі олар көп жағдайда алғашқы медициналық көмекті өз бетінше көрсетеді.

Мейіргер мамандығы үлкен төзімділікті, мейірімділікті, жауапкершілікті және кәсіби шеберлікті талап етеді. Науқастың көңіл-күйі, жазылуға деген сенімі көбіне мейіргердің қарым-қатынасына байланысты. Сондықтан мейіргердің жылы сөзі мен қамқорлығы – емнің жартысы деуге болады.

Бүгінде Қазақстанда мейіргерлердің кәсіби деңгейін арттыруға, олардың мәртебесін көтеруге ерекше көңіл бөлінуде. Мейіргерлерді даярлайтын колледждер мен жоғары оқу орындары заманауи стандарттарға сай білім береді. Бұл – халық денсаулығын қорғауға бағытталған маңызды қадам.

Қорытындылай келе, мейіргер – адам өмірінің сақшысы, үміт пен сенімнің нышаны. Олардың еңбегі – қоғам үшін баға жетпес қазына.