ПРЕЗИДЕНТ ЖОЛДАУЫ – КЕМЕЛ КЕЛЕШЕК БАСТАУЫ.15.09.2025. Түркістан жоғары медицина колледжінде Қазақстан Республикасының Президенті Қ.К.Тоқаевтың 8 қыркүйектегі «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауын насихаттау бойынша кездесу өтті.
Кездесуді Түркістан жоғары медицина колледжінің директоры, м.ғ.к. Бимурзаев Ғалымжан Нұрманұлы жүргізіп отырды. Жиынның басты мақсаты Қазақстан Республикасының Президенті Қ.К.Тоқаевтың Жолдауын талқылау екендігін айтып, еліміздің әлеуметтік-экономикалық дамуы мен қауіпсіздігін қамтамасыз ету үшін құрылған жоспардың маңыздылығына тоқталып өтті.
Алдымен күн тәртібіндегі мәселелерді талқылау бойынша регламенті бекітілді. Негізгі спикерлерге 10 минут, пікір айтушыларға 3-5 минут уақыт берілді.
Алғашқы сөз кезегін алған «AMANAT» партиясы Түркістан облыстық филиалының төрағасы, облыстық мәслихаттағы фракция жетекшісі Үмбеталиев Алтынсары Дүйсенбекұлы Жолдаудың біріктіруші идеясы – цифрландыруды кең көлемде дамыту және жасанды интеллектіні жаппай енгізу екендігін және маңызды құжаттағы медицина саласына қатысты басымдықтарды баяндады.
Қ.А.Ясауи атындағы Халықаралық қазақ-түрік университетінің Философия кафедрасының доценті, PhD доктор Қалдыбай Қайнар Жолдаудағы бағыттарды атап, әрқайсысын кеңінен түсіндіріп өтті. Елімізге қомақты инвестиция тарту, өңдеу өнеркәсібінің дамуына жаңа серпін беру, ауыл шаруашылығын жаңа деңгейге көтеру, көлік-логистиканы одан әрі дамыту, тұрғын үй-коммуналдық шаруашылығы мен су инфрақұрылымын жаңғырту, кәсіпкерлерге қолдау көрсету, экономиканы жан-жақты цифрлық жаңғырту жұмыстары мен адам капиталын дамытуға жағдай жасау туралы қандай қадамдар жасалатынын қарапайым тілмен түсіндірді.
Келесі сөз кезегін алған Қ.А.Ясауи атындағы Халықаралық қазақ-түрік университетінің профессоры, Түркістан қалалық мәслихатының депутаты Абусейтов Бекахмет Зайнидинұлы студенттер үшін Жолдаудың маңызын атап өтті. Бүгінгі студент ертеңгі тәжірибелі маман екендігін, ол тек сапалы білім алып қана қоймай, сонымен қатар еріктілер қатарынан көрініп, өзінің ойын ашық айта алатын және «Жасыл ел» бағдарламаларына атсалысатын қоғам үшін қызмет ететін, нағыз іскер азамат болып қалыптасуы қажеттігін айтты. Сонымен қатар Мемлекеттік бағдарламалардың басым бөлігі жастарды қолдау арналғанын мысалдар арқылы дәлел келтірді.
Түркістан облыстық мәслихат депутаты Арыстанов Сүлеймен Тұрсынбайұлы түптеп келгенде, Жолдауда айтылған қадамдар еліміздің түбегейлі цифрлық жаңғыруын халықтың тұрмыс сапасын жақсартуға бастайтын жол екенін айтып, алдағы уақытта атқарылар істер көп екенін жеткізді.
«Jastar Ruhy» Түркістан облыстық филиалының төрағасы Жұман Жансерік Бауыржанұлы Түркістан жастарының атқарып жатқан ауқымды жұмыстары туралы айтып, экологиялық жобалар мен мемлекеттік бағдарламаларға жастардың белсенді қатысып жүргендерін баяндады. Жолдауда көрсетілген алғышарттарды бүгінгі жастар қолдайтындығын білдірді.
Түркістан жоғары медицина колледжінің қазақ тілі және әдебиеті пәнінің оқытушысы, «Достық» бастауыш партия ұйымының төрайымы Алдабергенова Гүлмира Қыдырәліқызы Жолдауда кеңінен көрсетілген жасанды интеллект жайында баяндап, сабақ барысында қолданудың тиімді тұстарын атап өтті. Сөз соңында Президент жолдауын қолдауға шақырды.
Жиналысқа қатысушылар да өз пікірлерін айтып, ойларын ортаға салды. Кездесуді «AMANAT» партиясы Түркістан облыстық филиалының төрағасы, облыстық мәслихаттағы фракция жетекшісі Үмбеталиев Алтынсары Дүйсенбекұлы қорытындылады.
