ТҮРКІСТАНДА ТІГІЛГЕН СӘУКЕЛЕ ҚАЗАҚСТАННЫҢ РЕКОРДТАР КІТАБЫНА ЕНДІ.
Түркістанда тігілген ең үлкен сәукеле Қазақстанның рекордтар кітабына енгізілді. Бірегей экспонат 30-дан астам түркі халықтарының ою-өрнектерімен безендірілген. Әйелдерге арналған ұлттық бас киімнің биіктігі 5 метрден асады, ал жабуы 600 метр. Сонымен қатар, сәукеле халықаралық «Global Book of Records» рекордтар кітабына еніп, арнайы сертификат табысталды.
Тарихи сәтте Түркістанға Қазақстанның рекордтар кітабының ресми өкілі Қуандық Құдайбергенов арнайы еліп, сәукеленің рекордтық мәртебесін ресми түрде жариялады. Ол әлемде мұндай үлкен бас киімді ешкім жасамағанын атап өтіп, жобаны Гиннестің үшінші әлемдік рекордтар кітабына енгізу үшін тіркеу басталғандығын айтты.
Жоба авторы Ақмарал Дауылбаеваның айтуынша, ұлттық бас киім — бұл киімнің элементі ғана емес, халық бірлігі мен рухани сабақтастықтың айнасы.
«Сәукелеміздің биіктігі көкпен таласып, шыңмен тіресіп тұрсын дедік. Сондықтан оны 5 метр 20 сантиметр етіп жасадық. Ал, ою-өрнегін терең мағынамен көмкеруді жөн көріп, сәукеленің кейпінен Жер ананың бейнесін жасадық. Бір қолымен әлемді, бір қолымен бесікті тербеткен Ана — өмірдің мәңгілігін, тіршіліктің түп-тамырын білдіреді. Сол себепті оюын өмір ағашы бейнесінде өрнектедік»,- деді жоба авторы.Рекорд кітабы — адамдардың, жануарлардың, табиғи құбылыстардың немесе техника мен ғылымдағы ерекше жетістіктерін ресми түрде тіркеп, әлемге жариялайтын жинақ. Ең танымалы — Гиннестің рекордтар кітабы (Guinness World Records). Ол 1955 жылдан бері жыл сайын шығарылады және әлем бойынша миллиондаған рекордтарды қамтиды.
Бұл кітапқа кез келген адам өз жетістігімен ене алады. Ол үшін рекордтың ерекше, өлшенетін, дәлелденетін және қайталанатын болуы шарт. Өтініш ресми сайт арқылы жіберіледі, ал рекордты растау үшін бейне, фото, куәгерлердің мәліметтері ұсынылады.
Рекордтар кітабының түрлері көп: әлемдік, ұлттық, аймақтық және тіпті жергілікті рекорд жинақтары да бар. Қазақстанда да ерекше жетістіктерді тіркейтін платформалар мен байқаулар бар. Мұндай кітаптар адамдарды жаңа табыстарға ұмтылдырып, қызығушылық пен мотивация береді.
