ӘЗІМБЕК ПАЗЫЛБЕКҰЛЫ: «КӨМЕК ШЫН МҰҚТАЖ АЗАМАТТАРҒА ЖЕТУІ ТИІС».
Бүгін Түркістан қаласының әкімі Әзімбек Пазылбекұлының төрағалығымен өткен аппараттық мәжілісте халықты әлеуметтік қолдау шараларының орындалу барысы, атаулы әлеуметтік көмекті тағайындаудың өзекті мәселелері және кедейлік деңгейін төмендету бағытындағы жұмыстар қаралды.
Күн тәртібіндегі мәселе бойынша қалалық жұмыспен қамту және әлеуметтік бағдарламалар бөлімінің басшысы Эльмира Бейсенова баяндама жасады. Оның айтуынша, 2025 жылдың 9 айының қорытындысымен 8 233 адам, яғни 1 293 отбасы атаулы әлеуметтік көмек алған.
Өткен жылмен салыстырғанда кедейлік деңгейі 5,5 пайыздан 4 пайызға дейін төмендеген. Соның нәтижесінде 3 531 адам немесе 610 отбасы кедейлік шегінен шыққан. Сондай-ақ D–E деңгейлі отбасылар саны 358-ге азайып, жалпы төмендеу көрсеткіші 2,4 пайызды құраған.
Әлеуметтік инфрақұрылымды жетілдіру бағытында да оң нәтижелер байқалады. Жыл басынан бері 13 нысан мүмкіндігі шектеулі азаматтардың қажеттілігіне бейімделіп, жалпы бейімделген нысандар саны 182-ге жетті.
Мәжіліс барысында қала әкімі Әзімбек Пазылбекұлы атаулы әлеуметтік көмекті тағайындау процесінің ашықтығы мен тиімділігін арттыруды, сондай-ақ азаматтарды жұмыспен қамту тетіктерін күшейтуді тапсырды.
«Көмек шын мұқтаж азаматтарға дер кезінде жетуі тиіс. Біз халықты тек жәрдемақыға тәуелді етпей, тұрақты табыс көзіне жеткізуді мақсат етуіміз қажет. АӘК жұмыспен қамту бағдарламаларымен тығыз байланыста болуы керек», – деді қала әкімі.
Қазіргі таңда учаскелік комиссиялардың қызметі толық цифрландырылған. Өтініш берушілердің деректері мобильді қосымша арқылы тіркеліп, процестің ашықтығы қамтамасыз етілуде. 2025 жылы әлеуметтік қорғау саласында жалпы 8 951 өтініштің 6 697-і қанағаттандырылған.
Ал қалада мүгедектігі бар 12 202 азаматтар болса, жалпы халықтың 5 пайызын құрайды. Олар протездік-ортопедиялық бұйымдармен, сурдо-тифлотехникалық және гигиеналық құралдармен, сондай-ақ кресло-арбалармен қамтамасыз етілуде.
Мәжіліс соңында қала әкімі Әзімбек Пазылбекұлы жауапты сала басшыларына нақты тапсырмалар жүктеп, атаулы әлеуметтік көмекті тағайындау және төлеу рәсімінің ашықтығын күшейтіп, шынайы мұқтаж азаматтарды анықтау жұмыстарын жандандыруды тапсырды. Сондай-ақ, жұмыссыз және табысы төмен азаматтарды тұрақты жұмыспен қамту, әлеуметтік инфрақұрылымды дамыту, мүмкіндігі шектеулі жандарға қолжетімді орта қалыптастыру бағытындағы шараларды күшейтуді міндеттеді.
