Жастар мен өндіріс арасындағы алтын көпір: Түркістан техникалық колледжінде кәсіптік бағыттағы кездесу өтті.

Техникалық білім – табысты болашақтың негізі. Осы ұстанымды басты назарға алған Түркістан қалалық Мансап орталығы мен “Kazakhstan Lihua” ЖШС өкілдері Е.Тәңірбергенов атындағы индустриалды колледжден соң, кездесуді Түркістан техникалық колледжінде жалғастырды.

Басқосуда орталық директоры Жангелді Әбіләзім колледждің бітіруші курс студенттерімен еркін форматта әңгіме жүргізіп, “Жастар практикасы”, “Алғашқы жұмыс орны” сынды бағдарламалар арқылы табысты еңбек жолын бастаудың мүмкіндіктерін кеңінен таныстырды.

– Техникалық мамандық иелеріне сұраныс ешқашан азаймайды. Бастысы – өз қабілетіңе сеніп, дұрыс бағытта қадам жасау. Біз сіздерге сенеміз және әрқашан қолдау көрсетуге дайынбыз, – деді Жангелді Әбіләзім өз сөзінде.

Өз кезегінде “Kazakhstan Lihua” ЖШС мамандары да сөз алып, кәсіпорынның өндірістік әлеуетін таныстырып, нақты жұмыс орындарын ұсынды. Кездесу жастарға тек жұмыс емес, болашаққа сенім мен серпін сыйлады.Президентіміз Қасым-Жомарт Кемелұлы өз сөзінде елдің экономикалық дамуы мен әлеуметтік тұрақтылығында жұмысшы мамандардың орны ерекше екенін бірнеше рет атап өткен. Оның айтуынша, заманауи өндіріс, құрылыс, ауыл шаруашылығы, көлік және қызмет көрсету салалары сапалы кадрсыз алға баса алмайды. Сондықтан мемлекет техникалық және кәсіптік білім беруді күшейтіп, колледждердегі оқу бағдарламаларын жаңартып, дуальды білім беру жүйесін кеңейтіп келеді.

Президент жұмысшы мамандықтарының беделін арттыруды маңызды міндет деп санайды. Себебі елдің болашағы тек жоғары білімді мамандарға ғана емес, қолымен еңбек етіп, нақты өнім өндіретін адамдарға да байланысты. Жоғары жалақы, қауіпсіз еңбек жағдайы, әлеуметтік кепілдіктер – жұмысшыларға жасалуы тиіс басты қолдау. Мемлекет басшысы еңбек адамы әрқашан қоғамның құрметіне ие болуы керек деп есептейді.