ТҮРКІСТАНДА КӨПБАЛАЛЫ АНАЛАР МАРАПАТТАЛДЫ.

Түркістан қаласы әкімінің міндетін уақытша атқарушы Байдулла Оразбековтың қатысуымен елдің ертеңі – жас ұрпақты тәрбиелеуде өлшеусіз еңбек сіңіріп жүрген көпбалалы аналарды «Алтын алқа» және «Күміс алқамен» марапаттау рәсімі өтті.

Іс-шара барысында аналардың отбасындағы, қоғамдағы рөліне ерекше тоқталған Байдулла Оразбеков анаға деген шексіз алғыс пен құрметтің бұл рәсім арқылы көрініс тапқанын атап өтті.Ана — адам өміріндегі ең қасиетті тұлға, мейірім мен сезімнің, төзім мен даналықтың қайнар көзі. Ана өзінің жүрегіндегі шексіз жылуымен баласына өмір сыйлап қана қоймай, оның әрбір қадамын қалыптастырады, адам болуға үйретеді. Ананың алақаны – баланың алғашқы бесігі, ананың сөзі – алғашқы ұстазы.

Ана баласының қуанышына шаттанып, қайғысына ортақтасады, қиындықта демеу болады. Оның мейірімі ешбір уақытпен өлшенбейді, ал махаббатының тереңдігіне ешбір теңеу жетпейді. Ана үшін бала – өмірінің мәні, ал баланың жетістігі – ананың бақытын арттыратын ең үлкен сый.

Қандай жағдайда болмасын ана баласын жақсы көріп, кешіре біледі. Ол әрдайым баласын жақсылыққа жетелеп, дұрыс жол көрсетеді. Ананың жүрегі әрқашан жұмсақ, ал көзқарасы әрдайым қамқор. Әлемде ананың жан жылуына тең келетін күш жоқ десек, артық айтқандық емес.

Біз есею жолында анаға кейде назар аудармай кетуіміз мүмкін, бірақ оның әрбір айтқан ақылы, әрбір жасаған жақсылығы — өмір бойы серік болатын қазына. Ананы қадірлеу — өз болашағыңды қадірлеу, ал ананың алғысын алу — өмірдегі ең үлкен бата.

Анаға деген құрмет, сүйіспеншілік, алғыс — әр адамның парызы. Өйткені ана — мейірімнің символы, өмірдің бастау бұлағы, адамдықтың айнасы.

⠀

– Бүгін біз ел болашағын тәрбиелеуде өлшеусіз үлес қосып келе жатқан асыл аналарымыздың еңбегін лайықты бағалап, Мемлекет басшысының Жарлығына сәйкес “Алтын” және “Күміс” алқаларымен марапаттау мақсатында бас қосып отырмыз. Бұл – тек марапаттау шарасы ғана емес, сіздерге деген шынайы алғысымыздың, зор құрметіміздің белгісі. Ананың мейірімі мен төзімі – ұлттың баға жетпес байлығы, – деді Байдулла Оразбеков.

Қазіргі таңда Түркістан қаласында көпбалалы аналардың жалпы саны 15 739 адамды құрайды. Олардың ішінде 1 098 ана – «Алтын алқа», 2 366 ана – «Күміс алқа» иегері атанса, 71 анаға «Батыр ана» атағы берілген. Сонымен қатар, 95 ана І және ІІ дәрежелі «Ана даңқы» орденімен марапатталған. Бұдан бөлек, 18 жасқа дейінгі 4 және одан да көп баласы бар аналардың саны 12 109 адамға жетіп отыр. Бұл – өңірдегі демографиялық өсім мен аналардың қоғамдық рөлін айқындайтын маңызды көрсеткіштердің бірі.