Кентау қалалық орталық кітапхананың ұйымдастыруымен Сұлтанбек Қожанов атындағы орталық саябақта 4 маусым- Қазақстан Республикасы мемлекеттік рәміздер күніне арналған «Тәуелсіздік нышандары- елдігіміздің айғағы» атты әдеби викториналық ойын өтті. Іс- шараға Ататүрік атындағы N 4 мектеп — лицейдің ұстаздары мен оқушылары қатысты.
Қазақстан Республикасының рәміздері — бұл елдің егемендігі мен тәуелсіздігін білдіретін, мемлекеттің бірегейлігін, ұлттық болмысын, тарихи-мәдени құндылықтарын айқындайтын негізгі белгілер. Қазақстанның мемлекеттік рәміздеріне — Ту, Елтаңба және Әнұран жатады. Бұл рәміздер 1992 жылы ресми түрде қабылданып, сол уақыттан бері Қазақстан халқының мақтанышына айналды.
Мемлекеттік Ту — көгілдір түсті біртекті фонда алтын күн мен қыран бейнеленген. Сабына таяу бөлігінде ұлттық өрнек орналасқан. Көгілдір түс – ашық аспанды, бейбітшілікті және бірлікті білдіреді. Күн – өмір мен энергияның, ал қыран – еркіндік пен биік мақсаттардың символы. Ұлттық өрнек – қазақ халқының мәдениетінің көрінісі.
Мемлекеттік Елтаңба – шеңбер пішінінде жасалған. Оның ортасында шаңырақ бейнеленген, одан жан-жаққа уықтар тарайды. Бұл бейне — бірлік пен тұтастықтың нышаны. Шаңырақты айнала қанатты пырақтар бейнеленген. Елтаңбаның жоғарғы бөлігінде бесбұрышты жұлдыз бар. Ал төменгі жағында «QAZAQSTAN» деген жазу орналасқан. Елтаңбада алтын және көгілдір түстер басым, олар – жарқын болашақ пен тұрақтылықты білдіреді.
Мемлекеттік Әнұран — бұл халықтың рухын көтеретін, елге деген сүйіспеншілікті білдіретін әнұран. Қазіргі әнұранның мәтіні 2006 жылы қабылданған және оның сөзін жазған — Жұмекен Нәжімеденов пен Нұрсұлтан Назарбаев, ал музыкасы — Шәмші Қалдаяқовтікі. Әнұранда қазақ халқының тарихы, елге деген мақтаныш пен сенім бейнеленген.
Қазақстан Республикасының рәміздері — тек белгілер ғана емес, олар еліміздің тәуелсіздігінің, азаттығының нышаны. Әрбір азамат оларды құрметтеуге міндетті. Рәміздер елдің бірлігі мен тұтастығын, тарихы мен мәдениетін бейнелейді. Мектептерде, мемлекеттік мекемелерде рәміздерге құрмет көрсету – патриоттық тәрбиенің ажырамас бөлігі. Осылайша, рәміздер – ел болашағын айқындайтын басты құндылықтар қатарында.
