Мемлекет басшысы Қасым-Жомарт Тоқаев Түркістан жұртшылығымен кедесуде Түркістан қаласына тарихи және рухани елорда мәртебесін беру мәселесін көтерген болатын. Ерекше мәртебе беру туралы Заң жобасы Парламент Мәжілісінің қарауына енгізілді. Осы мақсатта Түркістанға арнайы келген ҚР Парламенті Мәжілісінің депутаттары пен жауапты министрлік өкілдерімен кездесіп, заңның маңызы туралы пікір алмастық.
Түркістанның тарихи орны айрықша ғой. Келешекте Түркі елдеріне ортақ іс-шаралардың бәрін осында өткізуді жоспарлап отырмыз. Соған сай әрі дайын болуымыз керек. Мемлекет басшысының қолдауымен тарихи шаһарды дамыту жұмыстары жүріп жатыр. Оған қоса қалаға ерекше мәртебе беру туралы Заң жобасы әзірленді. Бұл бастама қаламыздың дамуына тың серпін береді деп ойлаймын. Қаланың өзіндік сәулет үлгісін сақтай отырып, ескерткіштерін қорғап, тарихи шаһар ретінде дамытуымыз қажет. Түркістанға келетін туристер қазақтың тарихынан, салт-дәстүрінен, мәдениетінен мағлұмат алып, танысатындай болуы тиіс. Оларға біздің ұлттық ерекшелігіміз, тарихымыз қызықтырақ. Аталған заң жобасы осы бағыттағы жұмысты жүйелеуге мүмкіндік береді.
Бұл Заң жобасын әзірлеуге халық та тікелей атсалысып жатыр. Түркістанға жергілікті тұрғындары мен зиялы қауым өкілдерінің ойларын тыңдап, ұсыныстарын білу үшін келген Мәжіліс депутаттары бұл Заңды бекітерде айтылған ұсыныстар ескерілетінін айтты.
Мұндай маңызды шешім еліміз үшін ғана емес, күллі түркі әлемі үшін жағымды жаңалық болмақ.
